бичлэгСаяхан доктор, профессор Т.Мөнхжаргал багштай сургууль дээр тараад мэндийг нь мэдээд бага зэрэг ярилцав. Багш ч шавь бидэндээ сургаал үгээ хайрлаж байна. Надтай хамт манай сургуулийг өнгөрсөн хавар төгссөн Анар бид хоёр байсан юм. Багш та нар залуу улсууд их зүйлийг сурч мэдэх хэрэгтэй. Одоо сурч мэдэх зүйлд анхаарлаа төвлөрүүлэх. Тэгээд бас өглөө эрт босох хэрэгтэй гээд өглөө эрт босохын ач тусын талаар жишээн дээр тулгуурлан зарим нэг зүйлийг ярьж өгсөн юм.
Энэ блогыг хөтлөгч миний хувьд өглөө эрт босохын ач тусыг мэддэг байсан хэдий ч багшийн яриаг анхааралтай сонсоод бүр эрт босох хэрэгтэй гэсэн сэдэл төрөв. Гэхдээ арай л амжихгүй байхаа өглөөний 04:00 цагт босно гэдэг бол арай эрт байгаа биздээ.
За тэгээд яриа нилээд өрнөөд ирэхэд багш манай энэ Монголын эрдэмтэн судлаач нарын амжилтын нууц нь ердөө өглөө эрт босч “эрдмийн бүтээл”-ээ хийж, туурвиж байсантай холбоотой гэлээ. Жишээ дурьдаж хэлэв.
Нэрт зохиолч Ц.Дамдинсүрэн гуайг манай багш гэж ирээд л ярьж байна. Өглөө 04 цаг гээд сэрээд 08 цаг хүртэл зохиолоо бичдэг байсан. Бусад үед нь зөвхөн бодоод л явдаг байсан. Тэр хүний бүтээлүүдийн ихэнх нь өглөө эрт сэрж хийснээр л олонд хүрсэн гэлээ.
Мөн Л.Түдэв гуай бас л эрт босдог хүн. Өөрөө хоолоо хийж идээд архи, тамхи огт хэрэглэдэггүй их л хөдөлмөрч хүндээ гэж магтав.
Багшаас өөрөөс нь асуухад орой 20:40 гэж унтаад 04 цаг гээл босоол эрдмийн ажлаа хийдэг тухай элэн далангүй ярьсан билээ.
Манай Хууль Зүйн Сургуулийн захирал академич С.Нарангэрэл багш сургуулийн шинэ жил дээр үг хэлж байх яриандаа цухас өглөө эрт босох хэрэгтэйг мөн л дурдаж байсан. Багш мөн л эрт босдог хүн гэдгийг нь мэдэх юм байна. Ажлаа бүр 7 хоног, сараар төлөвлөдөг хүндээ.
Тэгэхээр эрдэмтэдийн ихэнх нь өглөөний цэнгэг агаарт, сэтгэл зүрх, оюуны өндөр чадамжаа гарган хөдөлмөрлөдөг гэсэн дүгнэлтэнд хүрч болохоор байгаа юм. Бас спортын алдартнууд хүртэл өглөө эрт босдог шүү дээ. Хөдөлмөрийн баатар Бадар-Ууган өглөө эрт босч гүйж, өөрийгөө ялан дийлж байсан тухай ярилцлага хүртэл өгсөн байсныг санаж байна.
За тэгээд өглөө эрт босохын тухай бага сага зүйл уншиж үзлээ. Уншаад үзсэн чинь маш их хэрэгтэйг ухааран ойлгов.
Үүнд:
· Өглөө эрт босохын ач тус нь эрүүл мэндэд эерэг нөлөөтэй. Шөнө сууснаас ач тус нь гурав дахин их байдаг гэнэ.
· Толгой сэргэг, аливаа зүйлийг хүлээн авах чадвар өндөр гээд тоочоод байвал үр шим нь их юмаа.
Хамгийн чухал зүйл бол: Өглөө эрт босчихоод хүн заавал өөртөө хэрэгтэй зүйлийг хийх. Энэ нь дахиж өглөө эрт босох урам зоригийг төрүүлдэг гэж байна лээ. Тэгэхгүй хий дэмий босоод байвал дахиж босох урам зориг буурдаг гэнэ.
Ингээд эргэцүүлээд бодохоор хөгжилд хүрсэн орны хүмүүсийн ихэнх нь өглөө эрт боссон байдаг юм билээ. Хөгжил өөд тэмүүлж, амжилтанд хүрэхийн тулд залуусаа бүгдээрээ өглөө эрт босч заншиж, шинэ шинэ зүйлийг бүтээхийн төлөө урагшлая. 04 цагт босч чадахгүй юм гэхэд 06 цагт босвол зүгээр байхаа.
.
