бичлэгДаяаршиж байгаа нийгэмд хэлгүй бол хөлгүй гэж их ярих болжээ. Бодоод үзэхээр үнэнч юм шиг. Гэхдээ хэтэрхий их туйлширч байгаа юм бишүү. Гадаад хэлнийг сурах хэрэгтэй гэж амтай болгон нь үг уралдан захиж хэлэх юм. Тэр хэлний хэрэгцээг нь хангах гээд өчнөөн олон гадаад хэлний тодотголтой сургууль, дамжаанууд үүд хаалгаа нээн хэдэн арван бор төгрөг халаасандаа хийсэн шиг маадгар сууна. Гэхдээ тэр сургууль, дамжааны нь үр дүн хаана гараад, гийгүүлээд байгааг нь сайн мэдэхгүй л юм. Хэл сурна гэдэг бол хувь хүний өөрийн хүсэл сонирхол, мэрийлт, чармайлт, хэрэгцээ шаардлагатай холбоотой биз. Тэрнээс биш албадан сургадаг зүйл биш гэдэгт итгэж суух юм. Дургүйд хүчгүй гэдэг биздээ.
Нэг талаас гадаад хэлийг сурах нь зөв боловч нөгөө талаас тийм ч сүртэй зүйл биш гэж бодогдоод байхын. Учир нь заавал олон хэл сурах албатай юмуу? Монголоор л нэг гадаад хэлний сургалттай сургуулиудад өчнөөн оюутан, мэргэжилтэнгүүд хэлний орчуулагчийн мэргэжлээр сурч төгсөөд ажлын байргүй хүмүүс лааз өшиглөөд явж байна шүү дээ. Тэгвэл энэ хүмүүсийг яах гэж улс бэлдээд, онцгойруулан мэргэжил олгоод байгаан. Яагаад гэдгийг нь би мэдэхгүй юм. Гэхдээ л гадаад хэлний мэргэжилтэн гэж Монголд байгаа байхгүй /эргэлзэв/.
Ажлын байрны зарыг харж суусан чинь англи хэлний мэдлэгтэй хүнийг хамгаалагч, зөөгч, ачигчаар ажилд авна гэсэн зар хүртэл байгааг харахаар инээд хүрэх шиг. Тэгэхлээр хэлний мэргэжилтэнгүүд маань хамгаалагч, зөөгч, болж төгсөж байгаад нэг их эмээгээд байх зүйл биш бололтой.
Манай улс хөгжих нь гарцаагүй. Хөгжлийг дагаад гадаадын иргэд Монголд ирж хоолоо залгуулах цаг ойрхон байгаа гэдэгт би хувьдаа итгэдэг, бас нууцхан сэтгэлдээ мөрөөддөг. Тэр гадаадынхан ирж л байг, бидэнд хөрөнгө оруулаад л, манай үндэсний хэлийг сурах гэж хичээгээд л. Энэ дүр зургийг би төсөөлж байна. Бид гадаад улсад гарч тэдний хэлийг сурах гэж зовдог шиг тэд манай улсад ирж бидний эх хэлийг сурах гэж хичээх хэрэгтэй. Ход ход...
Ингэж чадвал бид Үндэсний тусгаар тогтнолоо авч үлдэж байгаа нэг том бахархал, үнэлж баршгүй үнэт зүйл юм. Ингэхийн тулд бид Монгол хэлээ төгс төгөлдөр мэдэх хэрэгтэй гэсэн үг. Саяхан “Цагийн хүрд” үзэж сууж байхад Монгол бичгийг төрийн албан бичигт хэрэглэж эхэлсэн гэсэн сайхан мэдээг сонсоод сэтгэл хөдлөж л суулаа. Гадаад хэл биш Монгол хэл, бичгээ сурах хэрэгтэй болжээ. Монгол хэл бичгээрээ зөв ярьж, зөв бичиж чадахгүй байж гадаад хэл мэддэг гэж цээжээ дэлдэхээ болъе, өөрийнхөөрөө л байвал гоё шүү дээ.
Туйлшрал өөрөө хүнийг үгүй хийдэг, толгойдоо нэгийг бодож амьдаръя залуусаа...
Жич: Нийтлэлийг өөрийн үзэл бодолд тулгуурлан бичсэн болно. Өөр өөрийн бодлоороо туйлшралгүй хүлээн авна уу...
